Psa 143 | MMX | STEP | Leeme Silok, una ronga lisingising tarak! Una ronga i na lisingising lolos tinotno rak atla loklok taram ik mokso aleng; la uk lok epovo epovo leveng kakaape ram, kuren la una ronga ia!

Psalms 143

Lisingising Ti Loklok Tooro

1 Leeme Silok, una ronga lisingising tarak! Una ronga i na lisingising lolos tinotno rak atla loklok taram ik mokso aleng; la uk lok epovo epovo leveng kakaape ram, kuren la una ronga ia! 2 Nenia lasaxaruki ram, kuren la uguta lok li ia at loklok tongpen; atla kopmen teta ip sepsen at lamaram.

3 Lavamunepen tarak digara vuse ka vam ia la dira sep kapmek tinotno ia. Dira lok li vam ia at loogu xokoxo i main bonot, la a lok ngan tino nga nedi ua diga met axa gano at lereot. 4 Kuren la a gagas kusu ana raba xepe nga lorooro rak; atla lodoxoma abulubun na i suxuna rinotno nga ia.

5 A doxoma su ap mo levenaleng gara oon pam; la a doma mo lempanga nenu ugara lok pam i, la mo leven gugu ram i vot manga at lodoxoma rak. 6 A song aurut mi lukngak tu keneng at lisingising tarak; la labalak ik minu ru ngan ta loxongkangka vatmang.

7 Leeme Silok, una ronga res tarak! Nia ara doma abulubun tino. Uguta lok alipe u basinge ia, lavanga ana emu buru minedi ua di si uto xopok at lemenemen at labarongan. 8 Unak lox adoxoma ia at leven maxantamak axap mi mo labalamu lexen taram, atla lunuunu rak i tu saga ram. Leve singising tarak i uturut upana ru, kusu una lox ase ia mi langas nia anaba mumu asu i.

9 Leeme Silok, a vot saparap u xusu unak lok see rak; la una vaxat asu ia basinge lavamunepen tarak. 10 Nenu ne Moroa rak; una lox ase ia mi langas ti mumu asu lavavara ram. Unak lok luvukat tia, la una sasat ia pana at langas manmanton.

11 Leeme Silok, una sat asu ia basinge lavamunepen tarak ngan uga xaape vam min; una lok luvukat tia la una lox asepmus ia basinge na leven mumuat tarak! 12 Una sev amet lavamunepen tarak, atla nenu u balamu ia; la una lox abaava tino di mo dik lox asongot ia, atla nenia lasaxaruki ram.